"शिक्षणमंत्र्यांचा राजीनामा घेऊन आंदोलनाची धार बोथट करा!" — अनिल वीर यांचे सरकारला आव्हान

युवकांच्या असंतोषाची धग खेडोपाडी पोहोचणार; सरकारने वेळीच निर्णय घ्यावा

सातारा | प्रतिनिधी,दि.१७-:केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीवरून राज्यात आणि देशभरात सुरू असलेल्या युवकांच्या आंदोलनाला दिवसेंदिवस अधिक धार येत असल्याचे दिसून येत आहे. या पार्श्वभूमीवर सामाजिक कार्यकर्ते अनिल वीर यांनी सरकारला थेट इशारा देत, "शिक्षणमंत्र्यांचा राजीनामा घेऊन आंदोलनाची धार कमी करावी," अशी मागणी केली आहे.

दिल्लीपासून पेटलेले आंदोलन आता महानगरांमध्ये पोहोचले असून त्याची धग लवकरच ग्रामीण भागात आणि खेड्या-पाड्यांपर्यंत पोहोचण्याची चिन्हे दिसत आहेत. बेरोजगारी, स्पर्धा परीक्षा, भरती प्रक्रियेमधील गोंधळ आणि युवकांच्या प्रश्नांवरून वाढत असलेला रोष सरकारसाठी डोकेदुखी ठरत आहे.

अनिल वीर यांनी प्रसिद्धीस दिलेल्या निवेदनात म्हटले आहे की, युवकांच्या भावना दुर्लक्षित करून चालणार नाही. देशाचा आधारस्तंभ असलेल्या तरुणाईच्या प्रश्नांकडे गांभीर्याने पाहिले नाही तर परिस्थिती अधिक चिघळू शकते. आंदोलनाची मुख्य मागणी शिक्षणमंत्र्यांच्या राजीनाम्याची असल्याने सरकारने वेळ न दवडता निर्णय घ्यावा, असे त्यांनी नमूद केले.

युवकांमध्ये आंदोलनाला वाढता प्रतिसाद मिळत असून, विविध संघटना आणि बेरोजगार तरुण मोठ्या प्रमाणात या आंदोलनात सहभागी होत आहेत. विशेषतः युवक नेते अभिजित दिपके यांच्या नेतृत्वाला मोठा प्रतिसाद मिळत असल्याचे चित्र दिसत आहे. त्यांच्या नेतृत्वाखाली बेरोजगार आणि विद्यार्थ्यांनी एकत्र येत आंदोलनाला अधिक बळ दिले आहे.

राज्यातील अनेक भागांमध्ये आंदोलनाची चर्चा रंगू लागली असून, सरकारने वेळीच भूमिका स्पष्ट केली नाही तर हा असंतोष अधिक तीव्र होण्याची शक्यता व्यक्त केली जात आहे. युवकांच्या मागण्यांबाबत सकारात्मक निर्णय घेण्याची गरज असल्याचे मत विविध स्तरांतून व्यक्त होत आहे.