परीक्षांतील गैरव्यवहार आणि पेपरफुटीविरोधात उद्या मुंबईत विद्यार्थ्यांचा एल्गार; मंत्रालयावर धडकणार ‘आक्रोश मोर्चा’

मुंबई | प्रतिनिधी

दि.११/०६/२०२६

देशभरात विविध स्पर्धा परीक्षा आणि प्रवेश परीक्षांमध्ये होत असलेल्या कथित गैरव्यवहार, पेपरफुटी आणि विद्यार्थ्यांच्या भवितव्याशी खेळ करणाऱ्या व्यवस्थेविरोधात उद्या (दि. 12 जून) मुंबईत विद्यार्थ्यांचा मोठा एल्गार होणार आहे. सम्यक विद्यार्थी आंदोलन महाराष्ट्र राज्याच्या वतीने मंत्रालयावर भव्य ‘विद्यार्थी आक्रोश मोर्चा’ आयोजित करण्यात आला असून, सकाळी 11 वाजता बीएमसी बिल्डिंग ते मंत्रालय या मार्गावर हा मोर्चा काढण्यात येणार आहे.

या मोर्चामध्ये राज्यातील विविध जिल्ह्यांतील विद्यार्थी, युवक, पालक तसेच सामाजिक संघटनांचे कार्यकर्ते मोठ्या संख्येने सहभागी होणार असल्याचे आयोजकांनी सांगितले. विद्यार्थ्यांच्या शैक्षणिक हक्कांसाठी आणि परीक्षा प्रक्रियेमध्ये पारदर्शकता आणण्यासाठी हा मोर्चा काढण्यात येत असल्याचे आंदोलनकर्त्यांनी स्पष्ट केले आहे.

मोर्चाद्वारे केंद्र सरकारच्या शैक्षणिक धोरणांवर तसेच National Testing Agency (NTA) च्या कार्यपद्धतीवर तीव्र नाराजी व्यक्त केली जाणार आहे. यासोबतच केंद्रीय शिक्षणमंत्री Dharmendra Pradhan यांनी नैतिक जबाबदारी स्वीकारून आपल्या पदाचा राजीनामा द्यावा, अशी प्रमुख मागणी आंदोलनकर्त्यांनी केली आहे.

याशिवाय NTA ही संस्था रद्द करून तिच्याकडील सर्व राष्ट्रीय परीक्षांचे नियोजन व अंमलबजावणीची जबाबदारी Union Public Service Commission कडे सोपवावी, अशी मागणीही करण्यात आली आहे. वारंवार समोर येणाऱ्या पेपरफुटीच्या घटनांमुळे विद्यार्थ्यांचा परीक्षा व्यवस्थेवरील विश्वास डळमळीत झाला असून, लाखो विद्यार्थ्यांचे शैक्षणिक आणि व्यावसायिक भविष्य धोक्यात आल्याचा आरोप आंदोलनकर्त्यांनी केला आहे.

हा मोर्चा सम्यक विद्यार्थी आंदोलन, वंचित बहुजन आघाडी, युवा आघाडी आणि महिला आघाडी यांच्या संयुक्त विद्यमाने आयोजित करण्यात आला असून, राज्यभरातील विद्यार्थी, युवक आणि पालकांनी मोठ्या संख्येने सहभागी होऊन आंदोलन यशस्वी करावे, असे आवाहन आयोजकांकडून करण्यात आले आहे. विद्यार्थ्यांच्या प्रश्नांवर सरकारने तातडीने भूमिका स्पष्ट करावी, अन्यथा राज्यव्यापी आंदोलन अधिक तीव्र करण्यात येईल, असा इशाराही आंदोलनाच्या वतीने देण्यात आला आहे.