“उपचाराअभावी मजुराचा मृत्यू की प्रशासनाचा बळी?” सांगली सिव्हिल रुग्णालयावर ‘सदोष मनुष्यवधाचा गुन्हा’ दाखल करण्याची मागणी; वंचित बहुजन माथाडी युनियनचा इशारा

सांगली सिव्हिल रुग्णालयावर ‘सदोष मनुष्यवधाचा गुन्हा’ दाखल करण्याची मागणी; वंचित बहुजन माथाडी युनियनचा इशारा

सांगली ,दि.२२-: पद्मभूषण वसंतदादा पाटील शासकीय रुग्णालय, सांगली येथे एका गरीब मजूर रुग्णाचा उपचाराअभावी झालेल्या मृत्यूमुळे संतापाची लाट उसळली आहे. गंभीर अवस्थेतील रुग्णाला वेळेत उपचार मिळाले नाहीत, व्हेंटिलेटर सुविधा उपलब्ध नव्हती आणि संबंधित वैद्यकीय यंत्रणा जबाबदारी झटकत असल्याचा आरोप करण्यात आला आहे. या संपूर्ण घटनेमुळे शासकीय आरोग्य व्यवस्थेवर गंभीर प्रश्नचिन्ह निर्माण झाले आहे.

वंचित बहुजन माथाडी ट्रान्सपोर्ट व जनरल कामगार युनियन, महाराष्ट्र राज्य, सांगली जिल्हाच्या वतीने जिल्हा संपर्कप्रमुख संजय भूपाल कांबळे यांनी या घटनेचा तीव्र निषेध केला आहे. त्यांनी म्हटले आहे की, हा मृत्यू केवळ वैद्यकीय निष्काळजीपणाचा विषय नसून प्रशासकीय दुर्लक्षामुळे घडलेला गंभीर प्रकार आहे. रुग्णाला तातडीची उपचार सुविधा मिळाली असती तर त्याचा जीव वाचू शकला असता, असा आरोप त्यांनी केला.

घटनेच्या वेळी रुग्ण गंभीर अवस्थेत असताना आवश्यक उपचारांऐवजी डॉक्टर आणि कर्मचारी यांच्यात वाद सुरू होता, तसेच व्हेंटिलेटर सुविधा उपलब्ध नसल्यामुळे रुग्णाचा जीव धोक्यात आला. त्यामुळे संबंधित डॉक्टर, कर्मचारी आणि प्रशासकीय अधिकाऱ्यांच्या भूमिकेची सखोल चौकशी करून जबाबदारी निश्चित करावी, अशी मागणी करण्यात आली आहे.

युनियनने या प्रकरणाची उच्चस्तरीय एसआयटी अथवा न्यायालयीन चौकशी करावी, दोषींवर तात्काळ एफआयआर दाखल करून निलंबन व अटक करावी, मृत मजुराच्या कुटुंबाला किमान २५ लाख रुपयांची आर्थिक मदत आणि कुटुंबातील एका सदस्याला शासकीय नोकरी द्यावी, तसेच रुग्णालयातील व्हेंटिलेटर व इतर अत्यावश्यक सुविधांची तातडीने उपलब्धता सुनिश्चित करावी, अशा प्रमुख मागण्या केल्या आहेत.

याशिवाय संपूर्ण आरोग्य व्यवस्थेचे स्वतंत्र ऑडिट करून अशा घटना पुन्हा घडणार नाहीत याची खात्री करावी, अशी मागणीही करण्यात आली आहे.

दरम्यान, या प्रकरणात तात्काळ आणि कठोर कारवाई न झाल्यास वंचित बहुजन माथाडी ट्रान्सपोर्ट व जनरल कामगार युनियनच्या वतीने रुग्णालयावर धडक मोर्चा, ठिय्या आंदोलन तसेच राज्यव्यापी संघर्ष उभारण्यात येईल, असा इशारा देण्यात आला आहे.

या घटनेमुळे सर्वसामान्य नागरिकांमध्ये तीव्र संताप व्यक्त होत असून, “गरीबांच्या जीवाची किंमत शून्य आहे का?” असा सवाल जनतेकडून उपस्थित केला जात आहे. शासनाने या प्रकरणाची गांभीर्याने दखल घेऊन सत्य समोर आणावे आणि दोषींवर कठोर कारवाई करावी, अशी मागणी जोर धरत आहे.उपशीर्षक :

“सांगली सिव्हिलमध्ये उपचाराऐवजी निष्काळजीपणा? मजुराच्या मृत्यूनंतर संताप; दोषींवर कारवाईसाठी संघर्षाची हाक”