"खासदार संजय दिना पाटील यांच्यावर पत्रकार संरक्षण कायद्यान्वये गुन्हा दाखल करा"; बिलोलीत युवा ग्रामीण पत्रकार संघाचे निवेदन

बिलोली | प्रतिनिधी (विलास शेरे) दि.१-:ईशान्य मुंबईचे संजय दिना पाटील यांनी प्रसारमाध्यमांच्या प्रतिनिधींशी बोलताना कथितरित्या आक्षेपार्ह भाषा वापरून धमकी दिल्याचा आरोप करत त्यांच्या विरोधात पत्रकार संरक्षण कायद्यान्वये तात्काळ गुन्हा दाखल करण्याची मागणी बिलोली तालुका युवा ग्रामीण पत्रकार संघाच्या वतीने करण्यात आली आहे. यासंदर्भात उपविभागीय अधिकारी आणि पोलीस निरीक्षक यांना निवेदन सादर करण्यात आले.

निवेदनानुसार, काही दिवसांपूर्वी एका विषयावर पत्रकारांनी विचारलेल्या प्रश्नांना उत्तर देताना खासदार संजय दिना पाटील यांनी संतप्त होत पत्रकारांशी कथितरित्या अयोग्य भाषा वापरली आणि धमकीचे स्वरूप असलेले वक्तव्य केले. या घटनेमुळे पत्रकारांच्या अभिव्यक्ती स्वातंत्र्यावर गदा येत असून, राज्यभरातील पत्रकारांमध्ये संतापाचे वातावरण निर्माण झाल्याचा दावा संघटनेने केला आहे.

या प्रकरणी प्रशासनाने तातडीने चौकशी करून पत्रकार संरक्षण कायद्यान्वये आवश्यक ती कायदेशीर कारवाई करावी, अशी मागणी निवेदनाद्वारे करण्यात आली. लोकप्रतिनिधींनी पत्रकारांशी संयमाने आणि लोकशाही मूल्यांचा आदर राखून वागणे अपेक्षित असल्याचेही संघटनेने नमूद केले आहे.

हे निवेदन बिलोलीचे उपविभागीय अधिकारी क्रांती डोंबे तसेच पोलीस ठाण्याच्या पोलीस निरीक्षकांकडे सादर करण्यात आले. निवेदनावर युवा ग्रामीण पत्रकार संघाचे तालुका कार्याध्यक्ष सय्यद रियाज, तालुकाध्यक्ष संजय कुमार बिलोलीकर, पत्रकार मारोती भुसावळे, मिलिंद मांजरमकर आणि राजकुमार गादगे यांच्या स्वाक्षऱ्या आहेत.

यावेळी तालुका कार्याध्यक्ष सय्यद रियाज म्हणाले, "पत्रकारांना प्रश्न विचारण्याचा घटनात्मक अधिकार आहे. लोकप्रतिनिधींकडून पत्रकारांशी अशा प्रकारची भाषा वापरणे हे अत्यंत चिंताजनक आहे. त्यामुळे पत्रकारांच्या सुरक्षिततेचा प्रश्न निर्माण होत असून प्रशासनाने तात्काळ योग्य ती कायदेशीर कारवाई करावी."