फलटणमध्ये बुद्ध जयंती मिरवणुकीत पोलिसांनी खोडा घातल्याने तणाव; PI अरविंद काळे आणि सामाजिक कार्यकर्ते हरिश(आप्पा)काकडे यांच्यात शाब्दिक चकमक: पोलिसांच्या भूमिकेचा सर्वत्र जाहीर निषेध!

 फलटण: [प्रतिनिधी]

शांतीचा संदेश देणाऱ्या तथागत भगवान गौतम बुद्ध यांच्या जयंतीनिमित्त फलटण शहरात काढण्यात आलेल्या मिरवणुकीत पोलीस प्रशासनाच्या भूमिकेमुळे काही काळ तणावाचे वातावरण निर्माण झाले. फलटण शहर पोलीस स्टेशनचे पोलीस निरीक्षक अरविंद काळे आणि सामाजिक कार्यकर्ते हरिश (आप्पा) काकडे यांच्यात झालेल्या शाब्दिक चकमकीचा व्हिडिओ सध्या सोशल मीडियावर मोठ्या प्रमाणावर व्हायरल होत असून, पोलिसांच्या या वागणुकीचा सर्वत्र निषेध व्यक्त केला जात आहे.

मिळालेल्या माहितीनुसार, बुद्ध जयंतीची मिरवणूक शांततेच्या मार्गाने सुरू होती. पोलीस निरीक्षक अरविंद काळे यांनी मिरवणुकीत हस्तक्षेप करत वाद्ये बंद करण्यास सांगितले. यामुळे मिरवणूक काही काळ थांबवावी लागली. "पारंपरिक वाद्यांना वेळ असतानाही पोलीस जाणीवपूर्वक मिरवणूक अडवत आहेत," असा आरोप करत हरिश काकडे यांनी पोलिसांना जाब विचारला. यातून दोन्ही बाजूंनी मोठी शाब्दिक चकमक उडाली.

पोलिसांच्या नियोजनावर प्रश्नचिन्ह?

मिरवणुकीत कायदा व सुव्यवस्था राखण्यासाठी पोलीस बंदोबस्त तैनात असतो, मात्र या मिरवणुकीत पोलिसांच्या नियोजनाबाबत अनेक प्रश्न उपस्थित झाले आहेत:

वाहतुकीचा खोळंबा: मिरवणूक सुरू असतानाच गर्दीतून दुचाकी वाहने ये-जा करत होती. यामुळे मिरवणुकीत सहभागी झालेल्या नागरिकांना नाहक त्रास सहन करावा लागला. शहर पोलिसांनी नक्की बंदोबस्त कोठे लावला होता, असा सवाल नागरिक विचारत आहेत.

पोलीस गाड्यांची भूमिका: मिरवणुकीच्या अगदी पुढे पोलिसांच्या गाड्या चालत होत्या. मिरवणूक अत्यंत शिस्तीत आणि शांततेत सुरू असताना अशा प्रकारे गाड्या समोर ठेवून नेमका काय संदेश दिला जात होता, याबाबत संताप व्यक्त होत आहे.

जनमानसात संताप;

भगवान गौतम बुद्ध यांनी जगाला शांतीचा आणि संयमाचा संदेश दिला. त्यांच्या जयंतीची मिरवणूक ही नाचगाण्यापेक्षा वैचारिक आणि शांततेच्या मार्गाने काढली जाते. अशा पवित्र प्रसंगी पोलीस प्रशासनाने सहकार्याची भूमिका घेण्याऐवजी अडवणुकीचे धोरण अवलंबल्याने बौद्ध अनुयायांमध्ये तीव्र नाराजी आहे.

सोशल मीडियावर या घटनेचा व्हिडिओ व्हायरल झाल्यानंतर पोलीस निरीक्षक अरविंद काळे यांच्यावर टीकेची झोड उठली असून, त्यांच्या निषेधाचे फलक आणि पोस्ट्स व्हायरल होत आहेत. या प्रकारामुळे फलटण शहरात काही काळ भीती आणि तणावाचे वातावरण होते, मात्र संयमी भूमिकेमुळे पुढील अनर्थ टळला.

या घटनेनंतर आता वरिष्ठ पोलीस अधिकारी या प्रकरणाची काय दखल घेतात, याकडे सर्वांचे लक्ष लागले आहे.