माजी कॅबिनेट मंत्री श्री महादेवजी जानकर यांची पांडुरंग अहिवळे यांच्या निवासस्थानी सदिच्छा भेट; फलटण-कोरेगाव विधानसभा निवडणुकीबाबत मोठे संकेत

फलटण:[प्रतिनिधी] दि.21 मे 2026,

राष्ट्रीय समाज पक्षाचे (रासप) पक्षप्रमुख आणि माजी कॅबिनेट मंत्री श्री. महादेवजी जानकर साहेब यांनी नुकतीच फलटण येथील प्रसिद्ध सामाजिक कार्यकर्ते श्री. पांडुरंग अहिवळे यांच्या निवासस्थानी सदिच्छा भेट घेतली. या भेटीदरम्यान आगामी निवडणुका, दलित-ओबीसी-धनगर समाजाची राजकीय मोट आणि देशातील पुरोगामी चळवळ यांवर अत्यंत सविस्तर व महत्त्वपूर्ण चर्चा झाली.

शाहू-फुले-आंबेडकरांचे विचार टिकवण्यासाठी 'जीवाचे रान' करणार: महादेव जानकर;

चर्चेदरम्यान महादेव जानकर यांनी देशातील सद्य राजकीय आणि सामाजिक परिस्थितीवर चिंता व्यक्त केली. ते म्हणाले की, "येणाऱ्या काळात छत्रपती शाहू महाराज, महात्मा ज्योतिराव फुले आणि भारतरत्न डॉ. बाबासाहेब आंबेडकर यांचे पुरोगामी विचार पुढे घेऊन जाणारी सक्षम कार्यकर्त्यांची फळी निर्माण करणे ही काळाची गरज आहे. या देशात पुरोगामी विचार आणि लोकशाही मूल्यांचे रक्षण करण्यासाठी कितीही संघर्ष करावा लागला, तरी 'जीवाचे रान' करण्याची माझी तयारी आहे."

फलटण-कोरेगाव विधानसभेत परिवर्तनाची नांदी; वंचित घटकांची मोट बांधणार!

आगामी राजकीय गणितांवर भाष्य करताना जानकर साहेब यांनी फलटण-कोरेगाव विधानसभा मतदारसंघाबाबत मोठे संकेत दिले. दलित, ओबीसी आणि धनगर बांधवांची भक्कम सामाजिक व राजकीय मोट लवकरच बांधली जाईल, असा विश्वास त्यांनी व्यक्त केला. या ऐक्याच्या जोरावर आगामी फलटण-कोरेगाव विधानसभा निवडणुकीत या बहुजन वर्गाचा हक्काचा आमदार निवडून आणण्यासाठी संपूर्ण ताकदीनिशी प्रयत्न करणार असल्याचे त्यांनी स्पष्ट केले.

सत्ताधारी पक्षांतील बहुजन प्रतिनिधीत्वावर चिंता; लवकरच 'संवाद यात्रा'!!

सध्याच्या सत्ताधारी पक्षांमध्ये SC, ST आणि OBC समाजाला मिळत असलेल्या दुय्यम स्थानावर त्यांनी तीव्र नाराजी व्यक्त केली. कॅबिनेट मंत्री, आमदार, खासदार, राज्यमंत्री, विविध महामंडळे, महापौर, नगराध्यक्ष यांसारख्या सत्तेच्या प्रमुख आणि जबाबदारीच्या पदांवर आपल्या समाजातील लोकांना डावलले जात असल्याबद्दल त्यांनी चिंता व्यक्त केली.

सत्तेत असूनही आपल्या प्रतिनिधींना महत्त्वाचे निर्णय घेण्याचे अधिकार मिळत नाहीत, ही वस्तुस्थिती बदलण्यासाठी समाजात व्यापक जनजागृती आवश्यक आहे. यासाठीच आपण लवकरच राज्यभर 'समाज जागृती संवाद यात्रा' सुरू करणार असल्याची घोषणाही महादेव जानकर यांनी यावेळी केली.

कार्यकर्त्यांमध्ये नवा उत्साह;

राष्ट्रीय पातळीवर आणि महाराष्ट्राच्या राजकारणात आपल्या स्पष्टवक्तेपणासाठी ओळखल्या जाणाऱ्या महादेव जानकर यांच्या या दौऱ्यामुळे फलटणमधील राजकीय वातावरण चांगलेच तापले आहे. सामाजिक कार्यकर्ते पांडुरंग अहिवळे यांच्या घरी झालेल्या या महत्वपूर्ण बैठकीमुळे आगामी फलटण-कोरेगाव विधानसभा निवडणुकीत नव्या समीकरणांची नांदी पाहायला मिळणार, हे आता स्पष्ट झाले आहे. 

      या भेटीप्रसंगी  रासपचे प्रदेशाध्यक्ष शेवते साहेब, बापूसाहेब जगताप, ॲड. शरद काकडे, ॲड. शितल अहिवळे,ॲड.मनीष काकडे , पत्रकार राजेंद्र भाऊ काकडे,गणेश अहिवळे, rpi अध्यक्ष सतीश अहिवळे, विकी काकडे, शंकर भोसले, विक्रांत काकडे,सुमित काकडे, वंशराज (बच्चू भाई)अहिवळे, निखिल अहिवळे, रोशन अहिवळे, प्रशिक अहिवळे, सागर काकडे, शुभम अहिवळे, रासप चे पदाधिकारी अध्यक्ष, व कार्यकर्ते उपस्थित होते तसेच स्थानिक पदाधिकारी, कार्यकर्ते आणि मान्यवर मोठ्या संख्येने उपस्थित होते.