💥 फलटण पोलिसांचा 'महा-सर्च' ऑपरेशन! परराज्यातून शोधून काढले १२ लाखांचे ४० मोबाईल; नागरिकांच्या चेहऱ्यावर आणले हसू!

फलटण (प्रतिनिधी): 

हरवलेला किंवा चोरीला गेलेला मोबाईल पुन्हा मिळेल अशी आशा सोडून दिलेल्या ४० नागरिकांच्या चेहऱ्यावर फलटण शहर पोलिसांनी हसू आणले आहे. सातारा जिल्हा पोलीस दलाच्या विशेष मोहिमेतर्गत, फलटण शहर पोलिसांनी तांत्रिक विश्लेषणाच्या आधारे तब्बल १२ लाख रुपये किमतीचे ४० मोबाईल शोधून काढून ते त्यांच्या मूळ मालकांना सन्मानाने सुपूर्द केले आहेत. या धडाकेबाज कामगिरीमुळे फलटण शहर पोलिसांचे सर्वत्र कौतुक होत आहे.

'सी.ई.आय.आर.' (CEIR) पोर्टलचा ठरला मोठा आधार;

सातारा जिल्ह्याचे पोलीस अधीक्षक श्री. निखिल पिंगळे व अपर पोलीस अधीक्षक डॉ. वैशाली कडूकर यांच्या मार्गदर्शनाखाली जिल्ह्यात हरवलेले मोबाईल शोधण्यासाठी विशेष मोहीम राबवली जात आहे. याच मोहिमेचा भाग म्हणून, फलटण उपविभागाचे पोलीस अधिकारी श्री. विशाल खांबे आणि फलटण शहर पोलीस ठाण्याचे प्रभारी पोलीस निरीक्षक श्री. अरविंद काळे यांच्या नेतृत्वाखाली फलटण शहर गुन्हे प्रकटीकरण शाखेच्या पथकाने केंद्र सरकारच्या सी.ई.आय.आर. (CEIR) पोर्टलचा प्रभावी वापर केला.

या पथकाने तांत्रिक विश्लेषण करून केवळ महाराष्ट्रच नव्हे, तर कर्नाटक, उत्तर प्रदेश, गुजरात, तेलंगणा या परराज्यातून आणि महाराष्ट्रातील कोल्हापूर, औरंगाबाद, नाशिक, अहमदनगर, सोलापूर, धुळे व पुणे येथून तब्बल ४० मोबाईल शोधून काढण्यात यश मिळवले.

मान्यवरांच्या हस्ते मोबाईलचे वाटप!

दिनांक २५ मे २०२६ रोजी फलटण शहर पोलीस ठाण्यात एका विशेष कार्यक्रमाचे आयोजन करून हे मोबाईल मूळ मालकांना परत करण्यात आले. याप्रसंगी उपविभागीय पोलीस अधिकारी श्री. विशाल खांबे, फलटणचे तहसीलदार श्री. अभिजित जाधव आणि पोलीस निरीक्षक श्री. अरविंद काळे यांच्या हस्ते नागरिकांना त्यांचे मोबाईल सुपूर्द करण्यात आले. आपला मोबाईल आणि त्यातील डेटा सुरक्षित परत मिळाल्यामुळे नागरिकांनी पोलिसांचे मनापासून आभार मानले आणि पोलीस प्रशासनाचे तोंडभरून कौतुक केले.

आतापर्यंत ४५९ मोबाईल परत! फलटण शहर पोलिसांनी दिलेल्या माहितीनुसार, सन २०२४ ते आजतागायत त्यांनी अत्यंत कौतुकास्पद कामगिरी करत एकूण ४५९ हरवलेले मोबाईल शोधून ते त्यांच्या खऱ्या मालकांना यशस्वीरीत्या परत केले आहेत.

पोलिसांचे नागरिकांना आवाहन!

या प्रसंगी बोलताना उपविभागीय पोलीस अधिकारी श्री. विशाल खांबे व पोलीस निरीक्षक श्री. अरविंद काळे यांनी नागरिकांना आवाहन केले की, जर कोणाचा मोबाईल चोरीला गेला किंवा गहाळ झाला, तर घाबरून न जाता तातडीने जवळच्या पोलीस ठाण्याशी संपर्क साधावा किंवा 'सी.ई.आय.आर.' पोर्टलवर त्याची नोंद करावी.

या टीमने बजावली महत्वपूर्ण कामगिरी;

ही उल्लेखनीय कामगिरी पोलीस उपनिरीक्षक श्रीमती अयोध्या घोरपडे, सी.ई.आय.आर. पोर्टलचे कामकाज पाहणारे पोलीस अंमलदार स्वप्नील खराडे, तसेच पोलीस अंमलदार राणी फरांदे, महेश जगदाळे, जितेंद्र टिके, मुकेश घोरपडे आणि अतुल बळे यांनी करून दाखवली. त्यांच्या या उत्कृष्ट कामाबद्दल त्यांचे सर्व स्तरांतून अभिनंदन होत आहे.