सोनकसवाडी "स्थगित ग्रामसभा घेण्यास ग्रामपंचायतीची टाळाटाळ; ग्रामस्थांमध्ये संताप, लोकशाही प्रक्रियेला खो!"

 सोनकसवाडी कोरमअभावी स्थगित ग्रामसभा अद्यापही नाही; ग्रामपंचायतीची टाळाटाळ, ग्रामस्थांमध्ये नाराजी

सोनकसवाडी, प्रतिनिधी,दि.३१- : दिनांक २२ मे २०२६ रोजी आयोजित करण्यात आलेली ग्रामसभा कोरम अभावी स्थगित करण्यात आली होती. मात्र त्यानंतर नियमानुसार पुन्हा ग्रामसभा आयोजित करणे अपेक्षित असताना ग्रामपंचायतीकडून याबाबत कोणतीही ठोस कार्यवाही करण्यात आलेली नसल्याने ग्रामस्थांमध्ये नाराजीचे वातावरण निर्माण झाले आहे.

ग्रामसभेत गावाच्या विकासकामांबाबत, विविध योजनांच्या अंमलबजावणीबाबत तसेच ग्रामपंचायतीच्या आर्थिक व प्रशासकीय कामकाजाबाबत महत्त्वाचे निर्णय घेतले जातात. त्यामुळे स्थगित झालेली ग्रामसभा लवकरात लवकर घेणे आवश्यक असतानाही ग्रामपंचायत प्रशासनाकडून याकडे दुर्लक्ष होत असल्याचा आरोप नागरिकांकडून करण्यात येत आहे.

ग्रामस्थांच्या म्हणण्यानुसार, ग्रामसभेची नवीन तारीख जाहीर करण्याबाबत कोणतीही अधिकृत सूचना देण्यात आलेली नाही. त्यामुळे गावातील अनेक प्रश्न प्रलंबित राहिले असून विकासकामांवरही त्याचा परिणाम होत आहे. ग्रामसभेमध्ये नागरिकांना थेट सहभाग घेऊन प्रश्न मांडण्याचा अधिकार असतो. मात्र ग्रामसभा होत नसल्याने नागरिकांच्या लोकशाही हक्कांवर गदा येत असल्याची भावना व्यक्त होत आहे.

दरम्यान, ग्रामपंचायतीने तातडीने स्थगित ग्रामसभेची तारीख जाहीर करून ग्रामसभा आयोजित करावी, अशी मागणी ग्रामस्थांकडून होत आहे. अन्यथा संबंधित वरिष्ठ अधिकाऱ्यांकडे तक्रार करण्यात येईल, असा इशाराही काही नागरिकांनी दिला आहे.