आदर्की खुर्द येथील बेकायदेशीर बांधकाम न थांबवल्यास मंगळवारी तहसीलदार कार्यालयासमोर आत्मदहनाचा इशारा!

 

फलटण: दि.23 मे 2026,

आपल्या हक्काच्या जागेवर सुरू असलेले बेकायदेशीर बांधकाम तात्काळ थांबवावे, या मागणीसाठी सातत्याने विविध शासकीय कार्यालयांचे उंबरठे झिजवूनही कोणतीही दखल न घेतल्याने एका वृद्ध महिलेने थेट प्रशासनाला टोकाचा इशारा दिला आहे. येत्या मंगळवारी, २६ मे रोजी फलटण तहसीलदार कार्यालयासमोर संपूर्ण कुटुंबासह आत्मदहन (Self-Immolation) करणार असल्याचा लेखी अर्ज छबुताई ज्ञानु भंडलकर यांनी प्रशासनाला सादर केला आहे. या गंभीर पत्रामुळे फलटण तालुक्यात आणि प्रशासकीय वर्तुळात मोठी खळबळ उडालेली आहे.

मिळालेल्या माहितीनुसार, मौजे आदर्की खुर्द (ता. फलटण, जि. सातारा) येथील रहिवासी असलेल्या छबुताई ज्ञानु भंडलकर यांच्या मालकीच्या असणाऱ्या 'सि. स. नं. २८१' आणि '२८२' या जागेमध्ये काही इसमांकडून अनधिकृत व बेकायदेशीर घरकुल बांधकाम सुरू आहे. हे अवैध बांधकाम तात्काळ थांबवण्यात यावे यासाठी पीडित महिलेने १९ मे २०२६ रोजी ग्रामपंचायत, लोणंद पोलीस ठाणे, तहसीलदार फलटण, उपविभागीय अधिकारी, पंचायत समिती (BDO), भूमी अभिलेख कार्यालय आणि पोलीस अधीक्षक सातारा अशा तब्बल ७ वेगवेगळ्या ठिकाणी लेखी अर्ज सादर केले होते.

प्रशासकीय उदासीनतेचा कळस; लेखी उत्तरही मिळेना!

इतक्या महत्त्वाच्या आणि संवेदनशील प्रकरणात अनेक ठिकाणी धाव घेऊनही प्रशासनाकडून या महिलेला कोणतेही लेखी उत्तर देण्यात आले नाही, अथवा ते बेकायदेशीर बांधकाम थांबवण्यासाठी कोणतीही ठोस कारवाई करण्यात आली नाही. सततच्या शासकीय दिरंगाईमुळे आणि न्याय मिळत नसल्याने हताश झालेल्या छबुताई भंडलकर यांनी अखेर २१ मे रोजी थेट तहसीलदार कार्यालयाला अंतिम इशारा देणारे पत्र सुपूर्द केले, जे २२ मे रोजी शासकीय आवक-जावक विभागात स्वीकारले गेले आहे.

"काही बरे-वाईट झाल्यास प्रशासन जबाबदार!"

छबुताई भंडलकर यांनी अर्जात स्पष्ट म्हटले आहे की,

"माझ्या हक्काच्या जागेतील अवैध काम थांबवण्यासाठी मी सर्व ठिकाणी विनंती केली, पण कोणीही दखल घेतली नाही. त्यामुळे आता माझ्याकडे दुसरा पर्याय उरलेला नाही. मंगळवार, दि. २६/०५/२०२६ रोजी मी माझ्या कुटुंबासह तहसीलदार कार्यालयासमोर आत्मदहन करणार आहे. या दरम्यान आमच्या जिवाला काही बरे-वाईट झाल्यास किंवा जे काही नुकसान होईल, त्याला पूर्णपणे प्रशासनच जबाबदार राहील."

या अर्जाच्या प्रती पोलीस अधीक्षकांपासून ते स्थानिक पोलिसांपर्यंत सर्वांना पाठवण्यात आल्या आहेत. एका वृद्ध महिलेला आपल्याच जागेवरील अतिक्रमण हटवण्यासाठी थेट आत्मदहनाचा मार्ग निवडावा लागत असल्यामुळे स्थानिक नागरिकांमधून प्रशासनाच्या या ढिसाळ कारभारावर तीव्र संताप व्यक्त होत आहे. आता मंगळवार उजाडण्यापूर्वी फलटणचे तहसीलदार आणि पोलीस प्रशासन हे बेकायदेशीर बांधकाम थांबवून संबंधित कुटुंबाला न्याय देतात की अनर्थ ओढवून घेतात, याकडे संपूर्ण सातारा जिल्ह्याचे लक्ष लागले आहे.