🛑 बारामतीत सुरक्षा रक्षकावर जीवघेणा हल्ला; पर्यवेक्षकाविरोधात गुन्हा दाखल, कारवाईची मागणी

बारामती | दि. २८ मार्च २०२६

बारामती नगर परिषदेत काम करणाऱ्या सुरक्षा रक्षकांमधील वादाने गंभीर वळण घेतले असून, पगाराच्या मुद्द्यावरून जेष्ठ सुरक्षा रक्षकावर जीवघेणा हल्ला केल्याची धक्कादायक घटना उघडकीस आली आहे. या प्रकरणी बारामती शहर पोलिस ठाण्यात गुन्हा दाखल करण्यात आला आहे.

मिळालेल्या माहितीनुसार, जेष्ठ सुरक्षा रक्षक विजय मधुकर बगाडे यांनी गेल्या दोन महिन्यांपासून पगार मिळत नसल्याबाबत सुरक्षा पर्यवेक्षक दत्तात्रय अशोक साळवे यांना विचारणा केली होती. या साध्या प्रश्नावरून संतापलेल्या साळवे यांनी बगाडे यांना शिवीगाळ करत त्यांच्यावर जीवघेणा हल्ला करण्याचा प्रयत्न केल्याचा आरोप आहे.

घटनेदरम्यान उपस्थित इतर सुरक्षा रक्षकांनी तात्काळ मध्यस्थी केल्यामुळे विजय बगाडे हे थोडक्यात बचावले. या प्रकारामुळे कामगारांमध्ये भीतीचे वातावरण निर्माण झाले आहे.

दरम्यान, या घटनेच्या निषेधार्थ स्वराज्य शक्ती सेनेच्या वतीने बारामती शहर पोलिस ठाण्यात निवेदन देण्यात आले. संस्थापक अध्यक्षा सौ. करुणा धनंजय मुंडे यांच्या मार्गदर्शनाखाली आणि महाराष्ट्र प्रदेश सचिव प्रशांत सोनवणे यांच्या नेतृत्वाखाली पोलिस निरीक्षक श्रीशैल चिवडशेट्टी यांना निवेदन सादर करण्यात आले.

या निवेदनात आरोपी दत्तात्रय साळवे यांच्यावर दोन दिवसांत कठोर कारवाई करण्याची मागणी करण्यात आली आहे. अन्यथा तीव्र आंदोलन छेडण्याचा इशाराही देण्यात आला आहे.

यावेळी स्वराज्य शक्ती सेनेचे पुणे जिल्हाध्यक्ष तुषार गायकवाड, जिल्हा महासचिव दत्तात्रय माने, कामगार विंगचे संतोष चव्हाण, प्रविण कांबळे, संकेत भुजबळ, नितीन शिंदे, शिर्के यांच्यासह मोठ्या संख्येने कार्यकर्ते उपस्थित होते.

👉 पगाराच्या प्रश्नावरून थेट जीवावर बेतणारी घटना समोर आल्याने प्रशासनाच्या कारभारावर गंभीर प्रश्नचिन्ह निर्माण झाले आहे.