कायद्यात राहाल तर फायद्यात राहाल; वंचितच्या पत्रानंतर प्रशासनाची चूक कबूल

यवतमाळ,दि.२८- : वंचित बहुजन आघाडीचे जिल्हाध्यक्ष डॉ. नीरज वाघमारे यांनी जिल्हाधिकाऱ्यांना दिलेल्या निवेदनानंतर यवतमाळ नगर परिषद प्रशासनाने आपली चूक मान्य केल्याची घटना समोर आली आहे.

महिला व बालकल्याण विभागामार्फत ८ मार्च रोजी आयोजित करण्यात आलेल्या महिला मेळाव्याच्या निमंत्रण पत्रिकेवर भारत मातेची प्रतिमा छापण्यात आली होती. या प्रतिमेवर आक्षेप घेत डॉ. वाघमारे यांनी जिल्हाधिकाऱ्यांना पत्र देत सांगितले की, शासनाच्या अधिकृत कार्यक्रमात अशा प्रकारच्या प्रतिमांचा वापर करण्याबाबत कोणतेही स्पष्ट शासकीय निर्देश नाहीत. तसेच अशा प्रतिमांमुळे विशिष्ट विचारसरणीचा प्रचार होत असल्याची शक्यता त्यांनी व्यक्त केली होती.

या पत्राची दखल घेत नगर परिषद प्रशासनाने स्पष्टीकरण देताना नमूद केले की, संबंधित प्रतिमा ही केवळ प्रतीकात्मक स्वरूपात वापरण्यात आली होती. कोणत्याही धार्मिक, जातीय किंवा संघटनात्मक विचारसरणीचा प्रचार करण्याचा हेतू नव्हता. तसेच भविष्यात अशा शासकीय कार्यक्रमांच्या निमंत्रण पत्रिका तयार करताना शासन नियम, धर्मनिरपेक्षता आणि सर्वसमावेशकता यांचे काटेकोर पालन करण्यात येईल, असेही स्पष्ट करण्यात आले.

डॉ. वाघमारे यांनी उपस्थित केलेल्या मुद्द्यांमुळे निर्माण झालेला संभ्रम दूर करण्यासाठी प्रशासनाने सुधारात्मक भूमिका घेतली असून, या प्रकरणामुळे शासकीय कामकाजात कायदेशीर चौकटीचे महत्त्व पुन्हा अधोरेखित झाले आहे.