एकेक काडी तुटली… ‘आप’चा झाडू निष्प्रभ?
नवी दिल्ली,दि.२५- : भ्रष्टाचारविरोधी लाटेवर स्वार होत सत्तेच्या शिखरावर पोहोचलेली आम आदमी पार्टी (AAP) सध्या अभूतपूर्व राजकीय संकटाचा सामना करत असल्याचे चित्र स्पष्ट दिसत आहे. एकेकाळी दिल्लीच्या राजकारणात वर्चस्व गाजवणारा आणि पंजाबमध्ये सत्ता मिळवणारा हा पक्ष आता अंतर्गत मतभेद, नेत्यांचे बाहेर पडणे आणि विरोधकांच्या आक्रमक राजकारणामुळे हादरलेला दिसतो.
अरविंद केजरीवाल यांच्या नेतृत्वाखाली उभा राहिलेला “आप” पक्ष अण्णा हजारे यांच्या आंदोलनातून जन्माला आला. सुरुवातीच्या काळात पारंपरिक राजकारणाला पर्याय म्हणून उभ्या राहिलेल्या या पक्षाने दिल्लीकरांचा प्रचंड विश्वास संपादन केला. काँग्रेस आणि भारतीय जनता पार्टी (भाजप) या दोन्ही मोठ्या पक्षांना मागे टाकत “आप”ने सत्तेवर झेंडा रोवला.
मात्र, सत्तेच्या प्रवासात पक्षातील मतभेद उघड होत गेले. योगेंद्र यादव, प्रशांत भूषण, कुमार विश्वास, अलका लांबा, कपिल मिश्रा यांसारख्या अनेक दिग्गज नेत्यांनी पक्षाला रामराम ठोकला. या घडामोडींमुळे “आप”च्या संघटनात्मक ताकदीवर मोठा परिणाम झाल्याचे राजकीय विश्लेषकांचे मत आहे.
सध्या पक्षात मनीष सिसोदिया, संजय सिंह, आतिशी, सौरभ भारद्वाज, सत्येंद्र जैन, गोपाल राय यांसारखे नेते कार्यरत असले तरी पक्षाच्या भवितव्याबाबत प्रश्नचिन्ह निर्माण झाले आहे.
दरम्यान, भारतीय जनता पार्टी (भाजप) आणि “आप” यांच्यातील राजकीय संघर्ष अधिक तीव्र झाला आहे. केंद्रीय यंत्रणांच्या कारवाया, भ्रष्टाचाराचे आरोप आणि जोरदार राजकीय हल्ल्यांमुळे वातावरण तापले असून “आप” बचावाच्या भूमिकेत असल्याचे दिसते.
राजकीय वर्तुळात सध्या एकच चर्चा रंगली आहे—भ्रष्टाचाराचा ‘कचरा’ साफ करण्यासाठी हातात घेतलेला “झाडू” आता स्वतःच्याच घरात वापरण्याची वेळ आली आहे का? एकेक काडी तुटत चाललेल्या या झाडूमुळे “आप”ची ताकद कमी होत चालली आहे का, असा सवाल उपस्थित होत आहे.
आगामी निवडणुकांच्या पार्श्वभूमीवर “आप”समोर अस्तित्व टिकवण्याचे मोठे आव्हान उभे ठाकले आहे. केजरीवालांचा किल्ला पुन्हा भक्कम होणार की भगदाडांमुळे कोसळणार, हे येणारा काळच ठरवणार आहे.
0 टिप्पण्या
सर्व सामान्यांचा आधार, अन्याय अत्याचाराचा कर्दन काळ वंचित बहुजन न्यूज