🚨 फलटण नगरपरिषद हद्दीत २७ मे रोजी आरसीसी गटर चेंबरचे काम सुरू; जिल्हाधिकाऱ्यांचे चौकशी पत्र धडकताच पुरावे नष्ट करण्याचा कंत्राटदाराचा डाव! मुख्याधिकारी आता काय भूमिका घेणार ?जिल्हाधिकाऱ्यांना तात्काळ अहवाल पाठवणार का?

 

फलटण (प्रतिनिधी): 27 मे 2026,

फलटण नगरपरिषद हद्दीतील सार्वजनिक शौचालय ते कुरेशी नगर रस्त्याच्या कडेला सुरू असलेल्या आरसीसी गटर बांधकामातील कथित 'गटर घोटाळा' आता अत्यंत नाट्यमय वळणावर येऊन पोहोचला आहे. सातारा जिल्हाधिकाऱ्यांच्या कार्यालयाने या प्रकरणातील गैरव्यवहाराची गंभीर दखल घेऊन चौकशीचे आदेश जारी करताच, संबंधित कंत्राटदाराने आपले बेकायदेशीर व निकृष्ट दर्जाचे काम लपवण्यासाठी आणि पुरावे नष्ट करण्यासाठी थेट 'रेडीमेड चेंबर' (आयते चेंबर) आणून प्रशासनाची दिशाभूल करण्याचा डाव आखला आहे. आज, दिनांक २७ मे २०२६ रोजी या धक्कादायक प्रकाराची थेट घटनास्थळाच्या पुराव्यांसह फलटण नगरपरिषदेचे मुख्याधिकारी यांच्याकडे लेखी तक्रार दाखल करण्यात आली असून यामुळे संपूर्ण प्रशासनात खळबळ उडाली आहे.

जिल्हाधिकाऱ्यांचे पत्र धडकताच कंत्राटदाराचे धाबे दणाणले!

फलटण नगरपरिषद अंतर्गत सुरू असलेल्या गटर बांधकामामध्ये मोठ्या प्रमाणावर गैरव्यवहार आणि निकृष्ट दर्जाचे काम झाल्याचे उघडकीस आले होते. या गंभीर प्रकरणाची दखल सातारा जिल्हाधिकारी कार्यालयाच्या नगरपरिषद प्रशासन विभागाने घेऊन (पत्र क्रमांक: जा. क्र. साशा /नपा/का. क्र.०६/१५०२/२०२६) मुख्याधिकाऱ्यांना आपल्या स्तरावर नियमानुसार तातडीने उचित कारवाई करण्याचे आणि केलेल्या कारवाईबाबत विनाविलंब अवगत करण्याचे आदेश पत्राद्वारे दिले होते.

मात्र, जिल्हाधिकाऱ्यांचे हे चौकशी पत्र धडकल्याचे समजताच संबंधित कंत्राटदाराने मूळ निवेदेतील (Tender) अटी, शर्ती आणि निकषांना पूर्णपणे बगल देऊन, केवळ चौकशीच्या भीतीने जुने निकृष्ट काम लपवण्यासाठी काल बाजारपेठेतून 'रेडीमेड चेंबर' आणले.

📸 जीपीएस (GPS) पुराव्यांसह कंत्राटदार रंगेहात!

आज दिनांक २७/०५/२०२६ रोजी प्रत्यक्ष कामाच्या ठिकाणी (बौद्ध नगर, मंगळवार पेठ, पाण्याच्या टाकीजवळ) हे रेडीमेड चेंबर बसवून घाईघाईने चेंबर बांधण्याचे काम कंत्राटदाराकडून उघडपणे सुरू करण्यात आले. पण हा पुरावे मिटवण्याचा खेळ कॅमेऱ्यात कैद झाला आहे. घटनास्थळाचे थेट GPS लोकेशन (Lat 17.995329°, Long 74.432542°) आणि वेळ (दुपारी ०३:३४ ते ०३:३५) असलेले फोटो आता समोर आले आहेत, ज्यामध्ये कर्मचारी अत्यंत घाईघाईने निकृष्ट कामावर पांघरूण घालण्याचा प्रयत्न करताना दिसत आहेत.

कोणाची परवानगी? आणि नक्की कोणाला वाचवण्याचा प्रयत्न?

या थेट पुराव्यांनंतर आता फलटणच्या जनतेमधून तीव्र संताप व्यक्त होत असून अनेक सवाल उपस्थित केले जात आहेत:

आज २७ मे रोजी हे घाईघाईने काम सुरू करण्यासाठी कंत्राटदाराने कोणाची परवानगी घेतली?

जिल्हाधिकाऱ्यांचे आदेश असतानाही कंत्राटदार प्रशासनाच्या डोळ्यांत धूळ फेकून उघडपणे पुरावे नष्ट करण्याची हिंमत कशी करू शकतो?

या निकृष्ट काम करणाऱ्या कंत्राटदाराला पाठीशी घालून नक्की कोणाला वाचवण्याचा प्रयत्न सुरू आहे?

📋 मुख्याधिकाऱ्यांकडे तात्काळ पंचनामा करण्याची मागणी!

या गंभीर प्रकारानंतर मुख्याधिकाऱ्यांना सादर केलेल्या लेखी अर्जाद्वारे तात्काळ खालील मागण्या करण्यात आल्या आहेत:

१. आज दिनांक २७/०५/२०२६ रोजी सुरू असलेल्या चेंबर बांधकामाची प्रत्यक्ष जागेवर (On-site) भरारी पथक किंवा संबंधित अधिकाऱ्यांमार्फत तात्काळ चौकशी व पाहणी करण्यात यावी.

२. कंत्राटदाराकडून पुरावे नष्ट करण्याचा आणि प्रशासनाची दिशाभूल करण्याचा जो प्रयत्न सुरू आहे, त्याला तात्काळ स्थगिती देऊन सदर कामाचा पंचनामा करण्यात यावा.

३. जिल्हाधिकारी कार्यालयाच्या आदेशानुसार या संपूर्ण प्रकरणाची सखोल चौकशी करून दोषींवर कडक कायदेशीर कारवाई करण्यात यावी.

 मुख्याधिकारी काय भूमिका घेणार? जिल्हाधिकाऱ्यांना अहवाल पाठवणार का?

या थेट पुराव्यांच्या आणि लेखी अर्जाच्या रोखानंतर आता फलटण नगरपरिषदेचे मुख्याधिकारी काय भूमिका घेणार, याकडे सर्वांचे लक्ष लागले आहे. कंत्राटदाराच्या या चलाखीला ब्रेक लावून मुख्याधिकारी या संपूर्ण प्रकरणाचा निष्पक्ष चौकशी अहवाल सातारा जिल्हाधिकाऱ्यांना तात्काळ पाठवणार का? की दोषींना अभय दिले जाणार? याकडे आता संपूर्ण फलटणकरांचे आणि सजग नागरिकांचे लक्ष लागून राहिले आहे.